කාල්ටන් ක්‍රීඩා සමාජය විසින් කොළඹ නගරයේ රාත්‍රි මෝටර් රථ ධාවන තරග නීති විරෝධී අන්දමින් පවත්වා ඇති බැවින් ඊට එරෙහිව අල්ලස්‌ හෝ දූෂණ කොමිසමට පැමිණිලි කිරීමට එක්‌සත් ජාතික පක්‍ෂය තීරණය කර ඇත.
එම රාත්‍රි ධාවන තරගයෙන් රජයට විශාල බදු මුදලක්‌ අහිමි වී ඇති බැවින් මෙලෙස පැමිණිලි කිරීමට තීරණය කළ බව ඊයේ පැවැති මාධ්‍ය හමුවේදී බස්‌නාහිර පළාත් සභා එක්‌සත් ජාතික පක්‍ෂ මන්ත්‍රී මුජිබර් රහුමාන් මහතා පැවැසීය.
මෙම තරගයට මෙරටට ගෙන ආ විශේෂ මෝටර් රථවලට බදු සහන ලබාදීම, තරගාවලිය විනෝද බද්දෙන් නිදහස්‌ කිරීම, නොමිලේ විදුලිය ලබා ගැනීම, තරග සංවිධාන කටයුතු සඳහා හමුදා සෙබළුන් යෙදවීම, කොළඹ නගර සභාවේ අනුමැතියකින් තොරව ප්‍රවේශපත්‍ර අලෙවිය, මහජනතාවට හිරිහැරවන ලෙස කොළඹ මාර්ග වැසීම ඇතුළු කරුණු රැසක්‌ පදනම්කර ගනිමින් පැමිණිල්ල ඉදිරිපත් කරන බවද හෙතෙම පැවැසීය.
මෙම තරගාවලිය විනෝද බද්දෙන් නිදහස්‌ කිරීම බරපතළ වරදක්‌ බවත් පෞද්ගලික ක්‍රීඩා සමාජයක්‌ විසින් පවත්වන ලද මෙම තරගාවලිය විනෝද බද්දෙන් නිදහස්‌ කිරීම නිසා කොළඹ මහ නගර සභාවට අයවිය යුතු විශාල බදු මුදලක්‌ අහිමි වූ බවත් මන්ත්‍රීවරයා වැඩිදුරටත් සඳහන් කළේය.
.jpg)
