‘මහින්ද රාජපක්ෂ ප්‍රධාන යුද අපරාධකරුවන් යුදාධිකරණයට ගෙන ගිය දවසටයි මට නින්ද යන්නේ. එවිට තමයි මට සතුටු වෙන්ඩ පුළුවන් යැයි ශ්‍රී ලංකාවට එරෙහිව නිෂ්පාදනය කරන ලද ‘නෝ ෆයර් සෝන්’ චිත්‍රපටයේ අධ්යක්ෂ කැලම් මැක්රේ පසුගියදා කැනඩාවේ දී පැවැති දෙමළ සංස්කෘතික උත්සවයකදී ප්‍රකාශ කොට ඇත.
ශ්‍රී ලංකාවෙන් ඊට සහභාගි වී සිටි ශ්‍රී ධරන් මන්ත්‍රීවරයා එවිට ප්‍රකාශ කොට ඇත්තේ ‘ඒ දිනය ළඟදීම උදාවේවි’ යනුවෙනි.
මේ දෙමළ සංස්කෘතික උත්සවය සංවිධානය කර ඇත්තේ එල්ටීටීඊ හිතවාදීන්ගෙන් සමන්විත කැනඩා දෙමළ කේන්ද්‍රය විසිනි. ලෝකය පුරා විසිරී සිටින එල්ටීටීඊ නායකයන් රැසක් මේ උත්සවය සඳහා කැනඩාවට පැමිණ සිටියහ.
මැලේසියාවේදී ‘නෝ ෆයර් සෝන්’ ප්‍රදර්ශනය කිරීමට උත්සාහ ගැනීමේදී එම චිත්‍රපටය තහනම් කර මැක්රේ අත්අඩංගුවට ගත් නමුත් පසුව ඔහු කැනඩාවට පැමිණියේ ය.
දැනට එල්ටීටීඊ සංවිධානයේ නායකයකු ලෙස සැලකෙන එක්සත් රාජධානියේ වෙසෙන එමෑනුවෙල් දේව ගැතිවරයා ද විශේෂ ආරාධිතයකු ලෙස මීට සහභාගි වී ඇත.
ශ්‍රී ලංකාවේ දැනට සිදුවන අපරාධ ගැන විස්තර කරමින් ‘නෝ ෆයර් සෝන්’ ප්‍රදර්ශනය කර අවසානයේදී මැක්රේ විසින් මේ ප්‍රකාශය සිදු කොට ඇත.
මහින්ද රාජපක්ෂ ජනාධිපතිතුමාට අමතරව ගෝඨාභය රාජපක්ෂ මහතා ද ඔවුන්ගේ දෝෂ දර්ශනයට ලක්වී ඇති බවට වාර්තා වෙයි.
තමන් නිදහස් මාධ්‍යවේදියකු ලෙස හඳුන්වා දුන්නත් මැක්රේ නිතරම දේශන පවත්වන්නේත් පෙනී සිටින්නේත් චිත්‍රපට ප්‍රදර්ශනය කරන්නේත් එල්ටීටීඊ හිතවාදීන්ට බවද ඔහුගේ ක්‍රියා කලාපයෙන් පැහැදිලි වී ඇත.
මේ අතර මංගල සමරවීර මහතා පොදු රාජ්‍ය මණ්ඩලයීය නියෝජිතයන්ට දීර්ඝ ලිපියක් යවමින් යුද අපරාධ චෝදනා ඉදිරිපත් කැර ඇති බව ද වාර්තා වෙයි.
- සිළුමිණ
