පැසිපික් සාගරය හරහා ඇමරිකාව සහ ආසියාව යා කෙරෙන අන්තර්ජාල කේබල් පද්ධතියක් ගොඩනැගීමට ගූගල් සමාගම ආසියානු සමාගම් 5ක් සමග එක්ව ඇතැයි වාර්තා වේ.
ෆාස්ටර් ලෙස හැඳින්වෙන මෙම සබ්මැරීන කේබල් පද්ධතිය කිලෝමීටර් 9000ක් දිගින් යුක්ත වන අතර ජපානයේ චිකුරා සහ ෂිමා වෙත දැනට සම්බන්ධ කෙරෙන අතර ඉදිරියේදී තවත් ආසියානු නගර දක්වා දීර්ඝ කිරීමට නියමිතය.
ඇමරිකාව තුළ ලොස් ඇන්ජලීස්, සැන් ෆ‍්‍රැන්සිස්කෝ, පෝට්ලන්ඞ් සහ සියැටල් වැනි බටහිර වෙරළේ ප‍්‍රධාන නගර ෆාස්ටර් පද්ධතිය විසින් ආවරණය කරනු ඇතැයි පැවසේ.
මේ සඳහා වැයවන මුදල ඩොලර් මිලියන 300කි.
ඒ සඳහා චයිනා මොබයිල්, චයිනා ටෙලිකොම් ග්ලෝබල්, ග්ලෝබල් ට‍්‍රාන්සිට්, කේ.ඞී.ඞී.අයි සහ සින්ග්ටෙල් යන ආසියානු සමාගම් ආයෝජනය කර තිබේ.
ගූගල් සමාගමේ යටිතල පහසුකම් පිළිබඳ ජ්‍යෙෂ්ඨ උප සභාපති උර්ස් හොල්සෝල් පවසා ඇත්තේ මේ හරහා ආසියාව තුළ තම පාරිභෝගිකයන්ට වඩා වේගවත් අන්තර්ජාල පහසුකම් ලබාගත හැකිවනු ඇති බවයි.
මෙම කේබලයේ වේගය තත්පරයට ටෙරා බයිට් 60ක් වන අතර එය සාමාන්‍ය මොඩමයක වේගය මෙන් මිලියන 10 ගුණයක් වේගවත් වේ.
මින් පෙර 2008දී ගූගල් සමාගම විසින් ආසියාව තුළ යුනිටි සහ ගිණිකොනදිග ආසියා-ජපාන කේබලය නම් කේබල් ව්‍යාපෘති දෙකක් ඉදිකර තිබේ.
ෆාස්ටර්හි වැඩ කටයුතු වහා ආරම්භ වනු ඇති අතර එය 2016 මැද භාගය වන විට සක‍්‍රිය කිරීමට නියමිතය.
