කුමාරි තමන්ගෙ සැමියත් එකම දරුවත් එක්ක ජීවත් වුණේ පෝද්දල පැත්තෙ ගෙදරක. හරිම අහිංසක විදියට ජීවත් වුණු මේ කුරුලු කූඩුවට කාගෙන්වත් කිසිම බාධාවක් තිබුණෙ නැහැ. උදේ පාන්දර පහමාර වෙනකොට කුමාරි හදලා දෙන කෑම එකත් අරගෙන රස්සාවට යන කුමාරිගේ සැමියා රෑ නවය පහුවෙලා ගෙදර එනකල් ගෙදර ෙදාරේ වැඩපළ කරගෙන, දරුවවත් බලාගෙන කුමාරි හරිම සතුටෙන් ජීවත් වුණා. කුමාරිගෙ සැමියා රැකියාව කළේ උඩුගම ප්‍රදේශයේ ආයතනයක.
මේ විදියට කාටවත් කරදරයක් නැතිව ජීවත් වුණු කුමාරිගේ ගෙදරට පසුගිය සතියේ දවසක කවමදාකවත් දැකලා නැති අමුත්තො දෙන්නෙක් ගොඩ වැදුණා... දැකපු ගමන් පොඩි අමුත්තක් දැනුණත් කතා බහ කරනකොට මේ අමුත්තො දෙන්න කුමාරිට අමුත්තො වුණේ නැහැ... එතකොටත් වෙලාව රෑ 7.00ට විතර වෙලා. ස්කූටි වර්ගයේ යතුරුපැදියකින් කුමාරිගේ ගෙදරට ආපු මේ අමුත්තො දෙන්න බිරියයි, සැමියයි කියලා හඳුනගන්න නම් කුමාරිට අපහසු වුණේ නැහැ. හරිම ලස්සනට හැඳ පැලඳගෙන හිටපු කාන්තාව මුලින්ම කුමාරි එක්ක කතාවට වැටුණා.
"නංගී ඔයාගෙ මහත්තය මේසන් වැඩ කරනව නේද? අපි ආවෙ මේසන් බාස් කෙනෙක් හොයාගෙන. අපි හිතුවා ඔයාගේ මහත්තයටම අපේ වැඩෙත් භාර දෙන්න..."
අමුත්තියගේ මේ කතාවත් එක්ක කුමාරිට එක පාරටම අමුත්තක් දැනුණා. කවදාවත් දැකලවත් නැති කෙනෙක් කියන මේ කතාව මොකක්ද කියලා කුමාරි නැවත නැවතත් හිතුවා...
"අනේ අක්කෙ මගේ මහත්තයා මේසන් වැඩ කරන කෙනෙක් නෙවෙයිනෙ.... කවුද ඔයාලට එහෙම කිව්වෙ? අනෙක මම නම් ඔයාලව අඳුරන්නෙත් නැහැ." කුමාරි නාඳුනන කාන්තාවට කිව්වා... ඒත් එයා දිගින් දිගටම කිව්වෙ ඒ දෙන්න ආවෙ කුමාරිගේ සැමියා මේසන් බාස් කෙනෙක් කියලා හිතාගෙන එයාව එක්ක යන්න, ඒත් එහෙම නෙවෙයි නම් කොහොම හරි ඒ හරියේ වැඩ කරන මේසන් බාස් කෙනෙක්ව හොයලා දෙන්න කියලා... මේ දෙන්නගෙ කතා බහ අන්තිමට හොඳම යාළුවෝ දෙන්නෙක් කාලෙකින් මුණ ගැහිලා කරන කතා බහක් තරම් සුහද වෙන්න වැඩි වෙලාවක් ගියේ නැහැ. අන්තිමේට තමන්ගෙ නම මානෙල් කියලා හඳුන්වල දීපු නාඳුනන කාන්තාව එක්ක තමන්ගෙ දුරකතන අංකය හුවමාරු කරගන්න තරම් කුමාරි ඉක්මන් වුණා.
මේසන් බාස් කෙනෙක් හොයන මුවාවෙන් ආවට කතා බහ කරන කොට මානෙල් කියලා හඳුන්වලා දුන්නු මේ කාන්තාවටවත්, එයාගේ සැමියටවත් යන්න කලබලයක්වත්, බාස් කෙනෙක් ගැන මතකයක්වත් තිබුණේ නැහැ. කොහොමහරි ටික වෙලාවක් ඉඳලා මේ දෙන්න යන්න පිටත් වුණේ හරිම ළෙන්ගතු විදියට ආයෙත් මුණ ගැහෙන බලාපොරොත්තුවෙන් සමුදීලයි.
මේ විදියට කලින් දවසේ කතා කරලා ගිය මානෙල් ඊට පහුවදාත් කුමාරිට දුරකතන ඇමතුමක් ගත්තා.
"අනේ නංගි ඉතින් කොහොමද? ඔයා මොකද කරන්නෙ? හස්බන්ඩ් වැඩ වෙන්න ඇති නේද? ඔයාට ගෙදරට වෙලා තනියම ඉන්න කොට පාළු නැද්ද අනේ... මට නම් ජොබ් එකක්වත් නොකර එහෙම ඉන්න බෑ. අනෙක අතට කීයක් හරි එනවා නම් අපිට දෙන්නම හම්බ කරන නිසා දුකක් නැතිව ජීවත් වෙන්න පුළුවන්නෙ...." මානෙල් කුමාරිත් එක්ක කතා කළේ උතුරා ගිය සෙනෙහසක් කුමාරිට මවා පාන ගමන්.... තනියම ගෙදරට වෙලා ඉන්න කුමාරිට මේ කතාවට ආස හිතුණා. ඒත් එක පාරටම කුමාරි කිව්වෙ "ගෙදරට වෙලා වැඩපළ ටිකත් කරගෙන දරුවා බලාගෙන ඉන්න කොට වැඩක් කරන්න තව වෙලාවක් ඉතුරු වෙන්නෙ නෑ අක්කෙ" කියලා.
තමන් වටින් ගොඩින් දාන්න ගිය උගුලට කුමාරි එක පාරටම අහු වෙන්නෙ නෑ කියලා තේරුම් ගත්තු මානෙල් කලින් කතා කරපු ස්වරය වෙනස් කරලා තවත් ළෙන්ගතු වෙන ගමන් කුමාරිව රැකියාවක් කරවන්න පෙලඹෙව්වා....
"ඔහොම ගෙදරට වෙලා ඉඳලා හරියන්නෙ නෑ නංගි... බලන්න මේ තරුණ වයසේ තාම ඔයා ඉන්නෙ. ජොබ් එකක් කරලා කීයක් හරි ඉතුරු කරගත්තම ඔයාගෙ පවුලටම ඒක ශක්තියක් නෙ. පාට් ටයිම් ජොබ් එකක් විදියට මම ඕනේ නම් ඔයාට ජොබ් එකක් හොයලා දෙන්නම්. මාත් ඒ වගේ පාට් ටයිම් වැඩ කරලා තමයි අපි එදා ආපු අර අලුත්ම ස්කුටි එක ගත්තෙත්".
මානෙල්ගෙ යාප්පු වදන් කුමාරිව මෙල්ල කළේ ඔන්න ඔය විදියට. අන්තිමට කුමාරි මානෙල්ගෙ ගැටේට අහු වුණා. එයාටත් සල්ලිවල වටිනාකම ගෙදර අගහිඟකම් වැඩි වැඩියෙන් ඒ වෙලාවෙ දැනෙන්න ගත්තා. සැමියගෙන්වත් අහන්න කලින් මානෙල් කියපු රස්සාව මොකක්ද කියලා දැන ගන්න ඒ වෙලාවෙ කුමාරිට තිබුණේ පුදුම උනන්දුවක්.
"ඉතින් අක්කෙ ඕක මට ගැළපෙන රස්සාවක්ද? මොකක්ද ඉතින් ඔයා ඔය කියන පාට් ටයිම් ජොබ් එක" කුමාරි ඇහුවෙ ටිකක් පුදුමෙන් වගේ. දෙන්නත් එක්ක එකතු වෙලා අටවපු උගුලෙ කට ළඟටම අහිංසක මුවැත්තියක් ළඟා වෙනවා දැකපු මානෙල්ට සතුට ඉහිලුම් නැතිව ගියා... එයාට ඕන වුණේ කොහොම හරි මේ ගොදුර ඩැහැ ගන්න.
"ඉන්නකො නංගි, මට වඩා හොඳට මේ ජොබ් එක ගැන දන්නෙ අයිය තමයි. ඔන්න එයාගෙන්ම විස්තරේ අහන්නකො" කියලා දුරකතනය තමන්ගෙ සැමියට දීපු මානෙල් ඉස්සරහට තව කරන්න තියෙන දේවල් ගැන සැලැසුම් කරන ගමන් මේ දෙන්නගෙ කතාවට ඇහුම්කන් දුන්නා.
මෙච්චර වෙලා බිරියව ඉදිරියට දාලා උගුල් අටවපු මානෙල්ගෙ සැමියා මෙහෙයුමට බැස්සෙ ඒ වෙලාවේ.
"නංගි මේක අමාරු දෙයක් නෙවෙයි. ඔයාට තියෙන්නෙ උදේට ගාල්ලට යන්න විතරයි. අපි ඔයාට කස්ටමර් කෙනෙක් හොයලා දෙනවා. ඒ එක් කෙනෙක්ගෙන් අපි ඔයාට රුපියල් දාහක් දෙනවා. ඕනෙ නම් දවසට හතර දෙනෙක් වුණත් ඔයාට හොයා දෙන්න පුළුවන්. ගාණ තීරණය වෙන්නෙ ඉතින් ඔයාගේ උනන්දුව මත තමයි. මේ රස්සාවෙන් නංගි ඔයාට ඔයාගේ මහත්තය එන්න කලින් රුපියල් තුන් හාරදාහක් වුණත් දවසකට හොයාගෙන ගෙදර යන්න පුළුවන්".
මානෙල්ගෙ සැමියා දුරකතනය ගත්තු ගමන් කියවගෙන කියවගෙන ගියේ කුමාරිට වචනයක්වත් කියන්න ඉඩ තියන්නෙ නැතිව.
එක පාරටම ඔළුවට කඩාගෙන වැටුණු මේ කතාවයි මානෙල්ගෙ සැමියා කියපු කතාවයි නිසා කුමාරි මොන තරම් බය වුණාද කියනවා නම් ඒ වෙලාවෙම දුරකතනය විසන්ධි කරලා දැම්මා. ඒත් මානෙල්වත් එයාගේ සැමියවත් අතට ආපු වාසිය අහක දාන්න පසුබට වුණේ නැහැ. ඒ දෙන්නා දිගින් දිගටම කුමාරිගේ දුරකතනයට කතා කළා. ඒත් ඒ එකකටවත් කුමාරි පිළිතුරු දෙන්න ගියේ නැහැ. ඔය වෙලාවේ තමයි එයාට තේරුණේ එයා වැටෙන්න ගිය උගුලේ තරම.
තමන්ගේ සැමියා එනකල් නොඉවසිල්ලෙන් හිටපු කුමාරි සැමියා ගෙදරට ආපු ගමන් කලින් දවසෙ ගෙදරට ආපු අමුත්තො දෙන්න ගැනයි, උදේ ආපු දුරකතන ඇමැතුම ගැනයි සේරම විස්තර සැමියත් එක්ක කිව්වා. මේ දෙන්නම ඒ වෙලාවේ තීරණය කළා තමන්ව නොමනා ක්‍රියාවකට පොලඹවන්න උත්සාහ කරපු මේ ජාවාරම්කාර යුවළව පොලිසියට අල්ලලා දෙන්න ඕන කියලා.
මේ සිද්ධිය ගැන පෝද්දල පොලිසියේ පැමිණිල්ලක් දැම්මට පස්සේ අර යුවළ පිටුපස පොලිසියේ ඉව කැරකෙන්න පටන් ගත්තා. මේ මොනම දෙයක්වත් ගැන ඒ තරම් හිතුවේ නැති මානෙල්ලා හිතුවේ ඒ දුරකතන ඇමතුම ගැන කුමාරි කාටවත් කියන එකක් නැහැ කියලා... පෝද්දල පොලිසියේ ස්ථානාධිපති කීර්තිසිංහ ලියනගේ මහතාගේ මෙහෙයවීම උඩ මේ සිද්ධිය ගැන පොලිස් පරීක්‍ෂණ කෙරීගෙන යන අතරෙම මානෙල්ලත් තවත් උගුලකට මාන බලමින්ම තමන්ගේ රාජකාරිය වුණු ගැහැනු ජාවාරම ජයටම කරගෙන ගියා. ඒත් මේ දෙන්නට හොරෙන් පොලිස් කොස්තාපල්වරයෙක් උපාය දූතයෙක් විදියට මේ දෙන්න පසුපස යවන්නත් ස්ථානාධිපතිතුමා කටයුතු කරලා තියෙනවා කියලා මානෙල්වත් එයාගේ සැමියවත් දැනගෙන හිටියේ නැහැ.
ඔය විදියට මානෙල්ලව අල්ලන්න සැලැසුම් කරපු පොලිසිය මේ උපාය දූතයා හරහා මානෙල්ගෙ සැමියට දුරකතන ඇමතුමක් ගත්තා. ඒ ඇමතුමෙන් කිව්වේ තමන්ට ගණිකාවකගේ සේවය අවශ්‍ය වෙලා තියෙනවා කියලා... ඇමතුම දීපු ගමන්ම ක්‍රියාත්මක වුණු මානෙල්ගෙ සැමියා කිසිම බයක් සැකක් නැතිව ගනුදෙනු කතා කරගත්ත හැටි පොලිස් කොස්තාපල්වරයාගේ දුරකතනයේ පටිගත වෙනවා කියලා මානෙල්ගෙ සැමියා දැනගෙන හිටියේ නැහැ.
"රුපියල් 2,500ක් තමයි ගාණ. ඊට වඩා නම් අඩුවෙන් දැන් මේවා කෙරෙන්නෙ නැහැ..." මෙහෙම කියපු ජාවාරම්කාරයව කොහොම හරි හෙට්ටු කරලා හෙට්ටු කරලා 1,500කට කැමැති කරවගත්තු කොස්තාපල්වරයා එන්න ඕන කොතැනටද කියලා එයාගෙන් ඇහුවා.
"හරි මල්ලි, ඔයා පෝද්දල හන්දියට හවස 2.00ට එන්න. මම මල්ලීව ගෙනයන්න එතැනට එන්නම්". මානෙල්ගෙ සැමියා සුරංග කොස්තාපල්වරයාට කිව්වා... කියපු විදියට හරියටම හවස දෙක වෙනකොට කොට කලිසමක් ඇඳගෙන කනේ කරාබුවක් දාගත්තු හැඩි දැඩි තරුණයෙක් පෝද්දල මංසන්ධියට ඇවිත් තිබුණා. එතැනට ඇවිත් මානෙල්ගෙ සැමියා සුරංගට දුරකතන ඇමතුමක් ගත්තු තරුණයා තමන් ඉන්න තැන කිව්වා.
"අයියා මම ඇවිත් ඉන්නෙ".
"හරි මල්ලි මම විනාඩි දෙකෙන් ඔතැනට එනවා" දෙන්නම මුණ ගැහෙන හැටි කතා කර ගත්තා. වැඩි වෙලාවක් ගියෙ නෑ වේගයෙන් ආපු යතුරුපැදියක් උපාය දූත හැඩි දැඩි තරුණයා ඉස්සරහ නතර කළා.
තමන්ගෙ ජාවාරමේ අන්තිම මිනිත්තු කිහිපය තමයි මේ ගෙවෙන්නෙ කියලා නොදැන හිටපු සුරංග උපාය දූතයව තමන්ගේ යතුරුපැදියේ නංවාගෙන කෙළින්ම ගියේ තමන්ගෙම ගෙදරට... ගෙදරටම ගිහින් තමන්ගෙ බිරියව රුපියල් 1,500කට විකුණපු මානෙල්ගෙ සැමියා ඒ මුදල ගන්නවත් එක්කම මේ අයට නොදැනෙන්න ඔවුන් පසුපස ආපු පොලිස් නිලධාරීන් මේ ගැහැනු ගනුදෙනුවේ ප්‍රධාන ජාවාරම්කාර මානෙල් - සුරංග යුවළව අත්අඩංගුවට ගත්තා.
ගාල්ලේ ජනප්‍රිය පාසලක ඉගෙන ගන්න ගමන් පෝද්දල ප්‍රදේශයේ පාසලක ඉගෙන ගත්තු මානෙල් එක්ක පෙම් සබඳතාවක් පටන් ගත්තු සුරංග මවුපියන්ගේ අකැමැත්ත උඩම අවුරුදු 4ක් ප්‍රේම කරලා කසාද බැඳගත්තු ආදරණීය බිරියවම සල්ලාලයෙක්ට විකුණන්න යද්දි අන්තිමේ පොලිස් අත්අඩංගුවට පත් වුණා... මේ සිද්ධිය වෙන්න අවුරුද්දකට කලින් තමන්ගේ ජංගම දුරකතනයට ආපු ඇමතුමක් නිසා වයස්ගත කෙනකුගේ ඕනෑ එපාකම් පිරිමහපු මානෙල් අන්තිමේ මේක තමන්ගේ රැකියාව කරගෙන සැමියත් එක්ක හවුල් වෙලා තවත් අසරණියක් තමන් වැටුණු වළේ දාන්න යද්දි සුරංගත් එක්කම පොලිසියට අහුවුණා...
කොහොම වුණත් මානෙල්ගෙ ශරීරය විකිණීමේ වෙළෙ¼දාමත්, සුරංගගේ ගණිකාවන් සැපයීමේ ව්‍යාපාරයත් බොහොම දියුණුවට කරගෙන ඒ අය ඉක්මනින් පෝසත් වෙන්න හැදුවත් අන්තිමේ ඔවුන් දෙදෙනාටම සිද්ධ වුණේ නීතියේ රැහැනට හසුවෙන්න.
