කසිප්පු නිෂ්පාදනය කරන ස්ථානයක් වැටලීමට ගිය පොලිස් නිලධාරින්ට පොල්ලකින් පහර දීමට උත්සහ කළ බව කියන සැකකරුවෙකු ගෝඩා තොගයක්ද සමග හලාවත පොලීසිය විසින් අත්අඩංගුවට ගෙන ඇත. ඒ සමගම පොලිස් නිලධාරින් විසින් තමන්ට පහර දුන්නේ යැයි පවසමින් තවත් අයෙකු ප්‍රතිකාර සඳහා හලාවත මහා රෝහලට ඇතුළත් වී ඇත. මෙසේ අත්අඩංගුවට ගෙන සහ රෝහල්ගත කර ඇත්තේ ආරච්චිකට්ටුව , සෙංගල්ඔය පදිංචි සහෝදරයින් දෙදෙනෙකුය. බදාදා (16) සවස මෙම සිද්ධිය වී ඇත.
ආරච්චිකට්ටුව , සෙංගල්ඔය ප්‍රදේශයේ සිදුකර ගෙන යන බව කියන මහා පරිමාණයේ කසිප්පු නිෂ්පාදනාගාරයක් වැටලීමට බදාදා (16) සවස හලාවත පොලීසියේ ප්‍රජා පොලිස් ඒකකයේ නිලධාරීන් කණ්ඩායමක් ගොස් ඇත. වැටලීම සිදු කරන අවස්ථාවේදී එම ස්ථානයේ සිටි බව කියන එක් අයෙක් පොල්ලක් ගෙන පොලිස් නිලධාරීන්ට පහර දීමට උත්සහ කර ඇත. පසුව පොලිස් නිලධාරීන් විසින් සැකකරු අත්අඩංගුවට ගෙන ඇත. සැකකරු සන්තකයේ තිබූ බව කියන කසිප්පු නිපදවීමට ගන්නා ගෝඩා ග්‍රෑම් 4380 ක් අඩංගු බැරල් 02 ක්ද පොලීසිය විසින් අත්අඩංගුවට ගෙන ඇත.
ජුඩ් සමන්ත
