පලමු අදියර යටතේ කටුනායක සිට සිනමන් එයාර් ගුවන් සේවා ආරම්භ වන අතර Cessna 208 වර්ගයේ ගුවන් යානයක් ඒ සඳහා යොදා ගැනේ. කටුනායක ජාත්‍යන්තර ගුවන් තොටුපල සිට දිනපතා කොග්ගල හා දික්වැල්ලටත් නැවත කටුනායක ජාත්‍යන්තර ගුවන් තොටුපලටත් මෙමගින් ගුවන් සේවා සැපයෙනු ඇත.
මෙම ගුවන් සේවා කටුනායක ගුවන් තොටුපල පරිශ්‍ර සීමාවේ පිහිටි සිනමන් එයාර් ගුවන් සඳහා වෙන්වු දේශිය ගුවන් ගමන් සේවා පර්යන්තයේ සිට මෙහෙයවනු ලබන අතර කොග්ගල හා දික්වැල්ල දක්වා ගමන් ගන්නා දෛනික ගුවන් සේවා හරහා ඉදිරියේදී දකුණු දිග වෙරළ කළාපයේ ප්‍රධානම සංචාරක ආකර්ෂණය වන ගාල්ල, කොග්ගල, වැලිගම, මිරිස්ස, දික්වැල්ල හා තංගල්ල වෙත ප්‍රවේශ පහසුකම් නැංවීමක් ද සිදුවනු ඇත.
ශ්‍රී ජයවර්ධනපුර කලින් මඩ වගුරක්ව තිබු දියවන්නා ඔය කොළඹ අලංකරණ ව්‍යාපෘතිය යටතේ පුළුල් කර එය මෙවැනි ගුවන් යානා බැස්සවීම සඳහා උචිත ජලාශයක් බවට පත් කිරීම හ ඒ ආශ්‍රිත පරිසරය දෙස් විදෙස් සංචාරකයින්ගේ සිත් ඇද ගන්නා ප්‍රදේශයක් බවට පත් කිරීමෙන් අනතුරුව මෙම ගුවන් ගමන් සේවා ආරම්භ කරන ලදී.
ශ්‍රී ජයවර්ධනපුර පිහිටි වෝටර්ස් ඒජ්හි ගුවන් යානා අංගනය විවෘත විම හේතුවෙන් මෙම මස අග වන විට කටුනායක ජාත්‍යන්තර ගුවන් තොටුපල සිට කොළඹ හරහා මහනුවර (පොල්ගොල්ල) කරා ගුවන් සේවා ඇරඹීමට සිනමන් එයාර් කටයුතු කරනු ඇත. මෙමගින් කටුනායක ගුවන් තොටුපලට පැමිණෙන සංචාරකයින්ටද කොළඹ සිට මහනුවර කරා යන මගීන්ටද නුවර සිට නැවත කටුනායක කරා යන්නවුන්ටද මිනිත්තු 30 ක් වැනි කෙටි කාලයක් තුලදී සිය ගමන නිම කර ගැනීමට හැකියාව ලැබේ.
ඉදිරියේදී Cessna 208B Grand Caravan යානයක් එක්විමත් සමගම සිනමන් එයාර් ගුවන් සේවා කටුනායක සිට සීගිරිය, මඩකලපුව හා ත්‍රිකුණාමලය දක්වා පුළුල් කිරීමටද නියමිතය.
.jpg)
.jpg)
